Канн фестивалида ғолиб бўлган «Анора» кинофильми бўйича Ўзбекистон Кинематография агентлиги муносабат билдирди.
Агентлик бу каби ҳолатдан ҳайратга тушганини ёзади.
«Ўзбекистонимизнинг улуғвор бунёдкорлик ишлари, шижоат билан кетаётган ислоҳотлари, Учинчи ренессанс пойдеворини қуриш йўлидаги жонбозликлари, ўша фильм ижодкорларини ё ҳасад ёки ғараз туйғулари билан ўралган бўлса ажаб эмас», дейилган агентликнинг расмий телеграм саҳифасида. Уларнинг тахмин қилишича, «бу каби ёндашув ортида Ўзбекистонга дўст бўлмаган узоқ-яқиндаги турли халқаро ташкилотлар ёки нуфузли шахслар турган бўлиши» мумкин.
Ҳозирда ушбу баёнот агентликнинг телеграм саҳифасидан ўчириб ташланган.
Маълумот учун, америкалик режиссёр томонидан суратга олинган ўзбекистонлик фоҳиша қиз ҳақидаги фильм 77-Канн кинофестивалида “Олтин пальма япроғи” билан тақдирланди.
Фильмнинг бош қаҳрамони фоҳишалик билан шуғулланадиган ўзбек қизи сифатида тасвирланади. IMDb рейтингида 7,5 балл билан баҳоланган, бу юқори кўрсаткични англатади.
