Мамлакатда тиббиётни ривожлантириш, соҳада соғлом рақобат муҳитини яратиш, бу орқали аҳолига кўрсатилаётган тиббий хизматлар сифати ва қамровини янада оширишга алоҳида эътибор қаратилаётгани туфайли сўнгги 8 йилда Ўзбекистонда хусусий шифохоналар 2,7 баробарга кўпайиб, улар сони 3 200 тадан 8 800 тага етди. Улар сони ҳар йили ўртача 500-600 тага ортмоқда.
Шунингдек, хусусий тиббиёт муассасаларининг барчасида амбулатор, 1532 тасида стационар хизматлари ташкил этилиб, улар томонидан кўрсатилаётган тиббий хизмат турлари 726 тадан 2 251 тага ошди.
Айни пайтда мамлакатдаги барча тиббиёт муассасаларида ташкил этилган ўрин-жойларнинг 35 фоизи хусусий сектор улушига тўғри келмоқда. Яъни сўнгги йилларда нодавлат тиббиёт клиникаларида стационар шифо ўринлари сони сезиларли даражада ортиб, 2024 йилда 42 744 тани ташкил этмоқда.
Ушбу ижобий ўзгаришлар туфайли бугунги кунда соғлиқни сақлаш тизимида нодавлат тиббиётнинг улуши 30 фоизга етди.
Жумладан, лаборатория хизматларининг 40 фоизи, офтальмология ва оператив офтальмологиянинг 60 фоизи, ЛОР ва эндоскопик ЛОРнинг 70 фоизи ва стоматологик ташхис ҳамда муолажаларнинг 91 фоизи айнан хусусий клиникалар томонидан кўрсатиляпти.
