Шавкат Мирзиёев 30 август куни 2024−2030 йилларда давлат-хусусий шерикликни ривожлантириш чора-тадбирлари тўғрисидаги қарорни имзолади. Ҳужжат йўл, энергетика, таълим, транспорт, коммунал хўжалик, сув, экология ва бошқа соҳалардаги ДХШ лойиҳаларини ўз ичига олади.
2024−2026 йилларда жами 11,65 миллиард долларлик 17 та устувор лойиҳани амалга ошириш режалаштирилмоқда. Улар орасида қарийб 97 миллион долларга 14 минг ўринли 13 та мактабни қуриш ва жиҳозлаш ҳам бор. Лойиҳа Осиё тараққиёт банки билан ҳамкорликда Тошкент шаҳри ва вилоятида амалга оширилади. Тендернинг иккинчи босқичи жорий йилнинг сентябрь ойида эълон қилинади, 2025 йилнинг июнига қадар эса ғолиб аниқланиши ва у билан ДХШ шартномаси тузилиши керак.
Бундан ташқари, хусусий тадбиркорлар билан биргаликда қарийб 570 миллион долларга 66 минг ўринли 100 та мактаб қуриш ва жиҳозлаш кутилмоқда. Потенциал ҳамкорлар билан музокаралар декабргача ўтказилиши, лойиҳа концепцияси 2025 йилнинг июнь ойида ишлаб чиқилиши ва тасдиқланиши, август ойида ҳамкор танланиши, 2026 йилнинг февралида эса ДХШ келишуви имзоланиши керак.
Халқаро молия корпорацияси кўмагида Фарғона вилоятида 800 ўринга мўлжалланган кўп тармоқли клиника қуриш режалаштирилган. Лойиҳанинг тахминий қиймати 306 миллион долларга баҳоланмоқда. Лойиҳа концепциясини сентябрь ойида ишлаб чиқиш, тендер эса 2025 йил февраль ойида бошланиши режалаштирилган. Келгуси йил охирига қадар ғолиб эълон қилиниши ва у билан ДХШ шартномаси тузилиши керак.
Тошкент тиббиёт академияси ҳудудида 500 миллион долларга 1175 ўринли кўп тармоқли шифохона қуриш режалаштирилган. ДХШ шартномасини 2025 йилнинг мартигача тузиш кўзда тутилмоқда.
Урганч аэропортини модернизация қилиш ва ишончли бошқарувга ўтказиш режалаштирилган. Лойиҳа қиймати 181 миллион долларга баҳоланмоқда. 2025 йилнинг июнигача тендер ғолиби эълон қилиниши ва у билан ДХШ шартномаси тузилиши керак.
Янги Тошкент аэропортини қуриш ва уни ишончли бошқарувга ўтказиш режалаштирилмоқда. Лойиҳа қиймати 1,5 миллиард долларга баҳоланмоқда (илгари бу кўрсаткич 1 миллиард доллар деб эълон қилинган эди). 2025 йилнинг октябригача хусусий шерикни аниқлаш, 2026 йил охиригача эса ДХШ шартномасини имзолаш режалаштирилган.
Ўтган йилнинг май ойида Сингапурнинг Changi Airports International компанияси пойтахтдаги мавжуд аэропорт фаолиятини оптималлаштириш бўйича консультация бериши, шунингдек, янги аэропорт қурилишининг техник-иқтисодий асосларини ишлаб чиқишга кўмаклашиши хабар қилинган эди.
Келгуси йилда Наманган, Андижон ва Бухоро аэропортларини ҳам бошқарувга топшириш ва модернизация қилиш режалаштирилган.
Осиё тараққиёт банки кўмагида Наманган шаҳридаги канализация иншоотларини модернизация қилиш режалаштирилган. Лойиҳа қиймати 96 миллион долларга баҳоланмоқда. Қурилиш ишлари 2025 йилнинг апрелида бошланиб, 2027 йилнинг май ойида якунланиши кутилмоқда.
ОТБ, шунингдек, Бухоро вилоятидаги иссиқлик таъминоти тизимини модернизация қилиш ва ишончли бошқарувга ўтказишга ёрдам беради. Лойиҳа қиймати 122 миллион долларга баҳоланмоқда. 2026 йил сентябрь ойи охиригача тендер ғолибини эълон қилиш ва у билан ДХШ шартномасини тузиш режалаштирилган.
Сурхондарё вилоятида ичимлик суви таъминотини яхшилаш лойиҳаси 1,1 миллиард долларга баҳоланмоқда. 2024-йил ноябрь ойида хусусий шерик танлаш ва тизимни унга бошқарув учун 2025-йил январигача топшириш режалаштирилган. Франциянинг Suez лойиҳада қатнашмоқчи эди.
Ўтган йилнинг ноябрь ойида президент вилоятда ичимлик суви таъминоти лойиҳасининг биринчи босқичини бошлаган эди. Бу босқичда Тўпаланг сув омборидан сув Сариосиё, Денов, Шўрчи ва Қумқўрғон туманларига етиб келган. Вилоят аҳолисини ичимлик суви билан таъминлаш даражаси 70 фоизга етган.
Фарғона вилоятининг Данғара ва Бувайда туманлари, Жиззах вилоятининг Зомин ва Бахмал туманлари ҳамда Бухоро вилоятининг Когон туманида ҳам ичимлик суви ва канализация тармоқларини модернизация қилиш ва хусусий сектор бошқарувига ўтказиш режалаштирилмоқда. Лойиҳаларнинг умумий қиймати 100 миллион долларга баҳоланмоқда.
Халқаро молия корпорацияси кўмагида 300 миллион долларга 200 та йирик насос станцияларини модернизация қилиш, қуриш ва бошқариш кўзда тутилган. Тендерлар ғолибларини 2026 йил охиригача эълон қилиш режалаштирилмоқда.
Наманган вилоятида ҳам 2025 йилнинг июлигача 28 та насосни модернизация қилиш ва уларни бошқарувга ўтказиш режалаштирилган. Лойиҳанинг қиймати 125 миллион долларни ташкил этади.
Аввалроқ айни шу ҳужжатларга кўра, Ўзбекистоннинг барча ҳудудларидаги электр ва газ тақсимлаш тармоқларини хусусий операторлар бошқарувига ўтказиш режалаштирилаётгани ҳақида хабар берган эдик. Бундан ташқари, Тошкентдан Самарқанд ва Андижонгача бўлган пуллик автомобиль йўллари қурилишини бошлаш режалаштирилган.
2025 йил охирига қадар ОТБ кўмагида 75 миллион долларлик 20 минг ўринли 100 та болалар боғчаларини қуриш, реконструкция қилиш ва жиҳозлаш режалаштирилган.
Хусусий компаниялар билан биргаликда ҳар йили камида 100 та болалар боғчасини қуриш, реконструкция қилиш ва жиҳозлаш кутилмоқда. Лойиҳа қиймати 335 миллион долларни ташкил этади.
2026 йилнинг биринчи чорагига қадар Андижон ва Самарқанд вилоятларида ДХШ кўмагида 75 миллион долларга 10 минг ўринли 15 та мактаб қурилиши ва жиҳозланиши кутилмоқда.
Фарғона ва Наманган вилоятларида Европа тикланиш ва тараққиёт банки кўмагида 75 миллион доллар миқдорида 10 минг ўринли мактаблар қуриш ва жиҳозлаш режалаштирилган.
2027−2030 йилларда хусусий тадбиркорлар билан биргаликда камида 100 та мактаб (жами 450 та мактаб) қуриш режалаштирилган. Уларнинг умумий қиймати 3,3 миллиард долларга баҳоланмоқда.
ЕТТБ ва бошқа ташкилотлар кўмагида Тошкент шаҳрида олий ўқув юртлари талабалари учун 17 минг ўринли ётоқхоналар қуриш режалаштирилган. Лойиҳа қиймати 176 миллион долларни ташкил этади.
2027 йил охиригача Бухоро ва Андижон вилоятларида 250 миллион долларлик кўп тармоқли клиникалар қуриш режалаштирилган.
Самарқанд тиббиёт университети ҳудудида 800 ўринга мўлжалланган кўп тармоқли поликлиника қурилиши керак. Нархи — 250 миллион доллар, амалга ошириш муддати — 2026 йилнинг иккинчи чораги.
ДХШ доирасида Тошкент, Самарқанд ва Қўқон темирйўл вокзалларини модернизация қилиш ҳам режалаштирилган. Улар 2026 йил охиригача бошқарувга ўтказилиши мумкин. Лойиҳа қиймати 50 миллион долларни ташкил этади.
Бундан ташқари, гидроэнергетика, иссиқлик таъминоти ва канализация тизимларида ҳам қатор лойиҳалар амалга оширилиши режалаштирилган.
Лойиҳаларнинг тўлиқ рўйхати билан қарорда танишиш мумкин.
