Ўзбекистон делегациясининг Малайзияга хизмат сафари давомида қишлоқ хўжалиги технологиялари, дронлар ишлаб чиқариш, шоличилик, балиқчилик, каучук етиштириш ҳамда мева-сабзавот ва ипак маҳсулотларини экспорт қилиш бўйича амалий ҳамкорлик келишувлари имзоланди.
Хусусан, Meraque компанияси билан ҳамкорликда Тошкент вилоятида ақлли қишлоқ хўжалиги техникалари ва дронларни маҳаллийлаштириш режалаштирилди. Шунингдек, шўр ва сувсизликка чидамли шоли навларини тажриба сифатида экиш, «девзира» уруғини Малайзияга жўнатиш келишиб олинди.
Бундан ташқари, интенсив балиқчилик ва криветка етиштириш, мева-сабзавот ҳамда ипак маҳсулотларини экспорт қилиш йўналишлари йўлга қўйилади. Якулда, Малайзиянинг Jakim ташкилоти билан ҳамкорликда ўзбек фермерлари учун «Ҳалол» сертификати бўйича ўқув курслари ташкил этилади.
Ушбу ҳамкорлик лойиҳалари икки давлат қишлоқ хўжалигининг ривожланиши ва экспорт салоҳиятини оширишга хизмат қилади.
