Депутат энергетика соҳасини тушунган ва тушунмаганлар танқид қилаётгани, тарғибот тўғри йўлга қўйилмаганини айтиб ўтган.
«Миллий тикланиш» партияси депутати Алишер Қодиров ўзининг телеграмдаги саҳифасида Энергетика вазирлигининг тарғибот масаласига эътироз билдирди.
«Бугун жамиятимизда энергетика билан боғлиқ эътироз ва тушунмовчиликлар шунчалик кўпайиб кетдики, ижтимоий тармоқ орқали соҳани тушунган ҳам, тушунмаган ҳам танқид қиляпти», — деб ёзади депутат.
Юқоридаги ҳолатларнинг асосий сабаби Энергетика вазирлигининг тарғибот ишларини тўғри йўлга қўймагани билан боғлиқ.
«Бугун электр энергиянинг 75 фоизи газни ёқиш орқали ишлаб чиқарилаётгани, тармоқдаги муаммолар, «яшил энергетика»ни ривожлантириш борасидаги ишлар, лойиҳалар кўлами ҳақида одамларга ким маълумот беради?»,- дея қайд этган Қодиров.
Маълумот учун, депутат Алишер Қодировнинг бундан олдин «Тиллақатори газни уй иситиш учун ишлатган халқнинг косаси оқармайди» деган фикри кўплаб муҳокамаларга сабаб бўлган эди.
