Хитойдаги Shandong Suntech Chemical Group компанияси раҳбарияти маълум бир муддатгача оила қурмаган ходимларни ишдан бўшатиш ниятида эканлигини маълум қилди. Бу ҳақдаги огоҳлантириш 28 ёшдан 58 ёшгача бўлган барча ходимларга, шу жумладан аввал ажрашганларга ҳам юборилган.
Мактубда келтирилишича, агар ходимлар жорий йилнинг биринчи чораги охиригача «шахсий муаммосини» ҳал қила олмасалар, ёзма тушунтириш беришлари керак бўлади. Шунингдек, 2025 йил 30 сентябргача никоҳдан ўтмаётганлар ишдан бўшатилиши мумкинлиги таъкидланган.
Бу хабар ходимлар ўртасида катта норозиликка сабаб бўлди — кўпчилик ўз эътирозини билдириб, меҳнат қонунчилиги устидан назорат қилувчи маҳаллий органларга мурожаат қилган. Бунга жавобан, ишчилар ҳуқуқларини ҳимоя қилувчи хизмат вакиллари бу каби талаблар қонунга зид эканлигини ва агар компания ҳақиқатан ҳам кимнидир шу сабабга кўра ишдан бўшатса, жавобгарликка тортилиши ҳақида огоҳлантирди.
Ҳозирги вақтда вазият мураккаблигича қолмоқда, Shandong Suntech Chemical Group компаниясининг кўплаб ходимлари учун келажак номаълум бўлиб турибди.
