АҚШ пойтахтида «Озодлик Радиоси» фаолиятига қарши норозилик акциялари бўлиб ўтди. Намойишчилар АҚШ Конгрессининг Вакиллар палатаси ва Сенат бинолари олдида тўпланиб, ўз позицияларини ифода этдилар. Улар «Озодлик Радиоси»ни молиялаштиришни тўхтатишга чақириб, «Озодлик Радиосига маблағ ажратманг!», «Стоп Озодлик Радиоси!», «Сохта янгиликларга ишонманг!» ва «Озодлик Радиосини ёпинг!» каби шиорларни илгари суришди.
Намойишчилар радиостанция материаллари кўпинча бирёқлама эканлигини ва жамоатчиликни чалғитишини таъкидлашмоқда. Уларнинг фикрича, «Озодлик Радиоси» ахборот воситалари орқали маълум кун тартибини илгари суриб, жамоатчилик онгига таъсир кўрсатишга ҳаракат қилади.
Ушбу норозилик намойишлари кенг жамоатчилик муҳокамаларига сабаб бўлди. АҚШ сиёсатчилари USAID фаолиятини вақтинча тўхтатиш тўғрисида баёнот бергач, ижтимоий тармоқларда ОАВ мустақиллиги ва уларнинг халқаро ахборот маконидаги роли қизғин муҳокама қилинмоқда.
Бу норозиликлар қандай оқибатларга олиб келади?
Ҳозирча ҳукумат вакиллари ёки радиостанциянинг ўзи расмий баёнот бергани йўқ. Бироқ кузатувчиларнинг фикрича, жамоатчилик норозилиги «Озодлик Радиоси»нинг келажакдаги фаолияти давлат даражасида муҳокама қилинишига сабаб бўлиши мумкин.
