Австраалиянинг Cortical Labs компанияси дастурлаш тамойили асосида ишловчи илк биологик компьютер — CL1 қурилмасини тақдим этди. Бу қурилма ўлчами жиҳатидан оёқ кийим қутисига тенг бўлиб, ахборотни қайта ишлаш учун инсон мияси ҳужайраларидан фойдаланади.
CL1 юз минглаб нейронлардан ташкил топган бўлиб, улар озиқлантирувчи эритма ичида ривожланади ва кремний чипида жойлашган. Компания вакилларининг таъкидлашича, биологик тўқима ва кремний технологиясининг уйғунлиги мураккаб вазифаларни ечиш имконини беради.
Cortical Labs бош илмий ходими Бретт Каган CL1’ни “қути ичидаги тирик организм” деб атади. Қурилма газларни фильтрлаш, сақлаш, айлантириш ҳамда ҳароратни назорат қилиш тизимларига эга.
CL1 ҳозирча тажриба қурилмаси бўлса-да, унинг келажакда касалликларни моделлаштириш ва дори воситаларини синаш жараёнида ишлатилиши мумкинлиги таъкидланмоқда. Чунки аксарият неврологик ва руҳий касалликлар бўйича дориларни клиник синовдан ўтказиш миянинг мураккаблиги сабабли муваффақиятсиз тугайди.
Шунингдек, CL1 сунъий интеллект алгоритмларини тўлдирувчи восита сифатида ҳам фойдаланилиши мумкин. Каганнинг сўзларига кўра, биологик нейронлар чекланган маълумот асосида хулоса чиқариш қобилиятига эга бўлиб, бу жиҳатдан ҳозирги сунъий интеллект тизимларидан устунликка эга. Бундан ташқари, CL1 кам энергия талаб қилиши билан ҳам ажралиб туради.
Оддий сунъий интеллект тизимлари юқори қувват сарфлайди, CL1 эса жуда кам ресурс талаб қилади. Ҳозирда Cortical Labs CL1’ни “биологик сунъий интеллект”ни ривожлантириш воситаси сифатида таклиф қилмоқда. Шунингдек, айрим мутахассислар нейронларнинг оддий ўйин ўйнай олиши уларнинг мураккаб қарорлар қабул қила олишини англатмаслиги ҳақида огоҳлантирмоқда.
