United Airlines авиакомпаниясига тегишли Лос-Анжелес – Шанхай йўналиши бўйича парвоз қилган самолёт учувчилардан бири паспортини унутиб қолдиргани сабабли АҚШга қайтишга мажбур бўлди. Бу ҳақда CNN авиакомпания вакилларига таяниб хабар берди.
Boeing 787 самолёти шанба куни Лос-Анжелесдан 257 нафар йўловчи ва 13 нафар экипаж аъзоси билан учиб чиққан. Учишдан икки соат ўтгач, Тинч океани узра парвоз қилаётган самолёт Сан-Франциского қайтишга мажбур бўлган. Авиакомпания маълумотларига кўра, халқаро рейсни давом эттириш учун зарур ҳужжат бўлмагани туфайли ушбу қарор қабул қилинган.
Йўловчиларга овқатланиш ва кечикканлик учун компенсация тақдим этилган. Рейсни амалга ошириш учун янги экипаж юборилиб, улар йўловчиларни Шанхайга олти соатлик кечикиш билан етказиб қўйган.
