«СОЛИҚ МОБИЛ ИЛОВАСИ»да жисмоний шахслар учун мол-мулк ва ер солиғини бўлиб тўлаш имконияти ўчириб қўйилган.
Ўзбекистон Республикаси Солиқ кодекси 440-моддасининг тўртинчи қисмига кўра: солиқ даври учун солиқни тўлаш жисмоний шахслар томонидан 15 апрель ва 15 октябрга қадар тенг улушларда амалга оширилади.
Бироқ, Солиқ қўмитасига тегишли бўлган солиқ мобиль иловасида солиқларни тенг улушларда бўлиб тўлаш имконияти ўчириб қўйилган.
Солиқ мобиль иловасининг аввалги версияларида ҳисобланган ер ва мол-мулк солиғини нафақат тенг улушларда бўлиб тўлаш, балки тенг улушни ҳам исталган суммада бўлиб тўлаш имконияти мавжуд эди ва бу фуқаролар учун жуда қулай тизим ҳисобланарди.
Мисол учун, фуқарога жорий йил учун жами 500 минг сўм ер ва мол-мулк солиғи ҳисобланди дейлик. Фуқаро ушбу солиқларни 15 апрелгача 250 минг сўм, 15 октябрга қадар эса яна 250 минг сўм тарзида ёки имкониятига қараб белгиланган муддатлар ичида хохласа 50 минг сўмдан, хохласа 100 минг сўмдан ойлар давомида тўлаши мумкин эди. Энди эса бу имконият мавжуд эмас.
Бўлиб тўлаш имконияти нега ўчирилгани тўғрисида Солиқ қўмитасининг масъул ходимларига берилган саволларга қуйидагича тушунтиришлар олинди:
Эмишки, айрим фуқаролар ҳисобланган солиқдан кўп сумма тўлаб юборгани учун ортиқча тўланган солиқни қайтариш муаммо бўлган ва шунинг учун ихтиёрий сумма тўлаш имконияти чекланган.
Энди фуқаро солиқларни бўлиб тўламоқчи бўлса ҳудудий солиқ органларига бориб мурожаат қилиши ёки бошқа тўлов тизимларидан фойдаланиши, солиқ мобиль иловасидан фойдаланмаслиги мумкин экан.
Энди ҳақли саволлар туғилади:
- Нега энди айримлар ортиқча пул тўлаб юборгани сабали бошқаларнинг имконияти чекланиши керак?
- Нега солиқ мобиль иловасида фуқаро томонидан унга ҳисобланган солиқдан ошиқ сумма киритилганда қабул қилмаслик имконияти жорий этилмади?
- Нега фуқаролар барча соҳалар рақамлаштирилган даврда солиқ органларига ва банкка вақт сарфлаб бориши ва навбатда туриши керак ёки нега бошқа мобиль иловалар орқали қўшимча комиссия тўлаган ҳолда солиқ тўлаши керак?
Солиқ қўмитасидан тез орада дастурдаги ушбу имкониятни қайтадан ёқишни сўраб қоламиз. Кам ойликка ишлайдиган фуқароларни ҳам ўйланглар, хурматли солиқчилар.
