Тошкентда июль ойидан бошлаб янги типдаги автобус бекатлари ўрнатилади. Ушбу бекатлар мустаҳкам шиша, маълумот таблоси, кузатув камералари, 112 фавқулодда чақирув тугмаси ва қувватлантирувчи қурилмалар билан жиҳозланади. Улар реклама орқали даромад оладиган тадбиркорларга ижара асосида берилади.
Шаҳар бўйлаб тахминан 2500 та бекатни янгилаш режалаштирилган. Дастлаб дўкон бўлмаган бекатлар алмаштирилади, сўнгра дўконли бекатларни бузиш ёки кўчириш жараёни бошланади. Бироқ кадастр реестрига эга тадбиркорларнинг дўконлари бузилмайди, балки бекат бошқа жойга кўчирилади.
Шунингдек, шаҳар маъмурияти бекатлар йўловчилар учун қулай жойга ўрнатилишини таъкидламоқда.
