Тошкент вилоятидаги 50-сон Манзил-колонияда жазо муддатини ўтаётган маҳкум Т.И. колония ходимлари томонидан қийноққа солиниб, сўнг асоссиз равишда интизомий бўлинмага жойлаштирилгани ҳақида Омбудсманга мурожаат қилди.
Олиб борилган ўрганишлар давомида маҳкум Т.И. Пискент тумани марказий шифохонасига ётқизилгани ва шифокорлар хулосасига кўра, унинг бош ва кўкрак қисмида лат ейиш аломатлари борлиги аниқланган.
Ҳужжатларни текшириш жараёнида, маҳкум Т.И. 2025 йил 27 февраль куни 10 суткага интизомий бўлинмага жойлаштирилгани маълум бўлди. Аммо бу қарор Тошкент махсус прокурори томонидан ўрганилиб, бекор қилинди. Колония маъмуриятининг ҳаракатлари Жиноят-ижроия кодексининг 105-моддаси (маҳкумларни интизомий жазолаш шартлари) ва 111-моддаси (қўпол тартиббузарлик тушунчаси) талабларига зид деб топилди.
