Наманган вилояти, Поп туманида оёғи синиб икки марта операция қилинган бемор комага тушиб вафот этди. «Ҳудуд» информацион дастури мухбири Руҳсора Ғофурова Попга бориб воқеа тафсилотларини ўрганди.
Маълум бўлишича, 36 ёшли Ҳожиакбар Қирғизов далада ишлаётганда йиқилиб тушган. Текширувларда унинг чап оёқ сон қисми сингани аниқланади.
16 март куни у биринчи бор операция қилинган. Аммо амалиёт муваффақиятсиз якунланган. Иккинчи амалиётда эса Фарғонада мутахассис чақирилган. Бироқ вазият ўнгланмай, бемор комага тушган ва вафот этган.
Беморнинг отаси Муҳаммаджон Қирғизовга кўра, поплик шифокорлар беморни Наманган шаҳрига олиб боришга қаршилик қилган. Бемор биринчи операция жараёнида қийналганини оиласига сўзлаб берган.
Муҳаммаджон Қирғизовнинг айтишича, Поп тиббиёт бирлашмаси бош шифокори ўринбосари бўлган Бунёд Юнусов ундан минг АҚШ доллари олган.
Мухбирлар Бунёд Юнусовни Поп тумани прокуратурасида учратди.
Журналистлар билан суҳбатда Юнусов операциянинг кечаси ва якшанба куни ўтказилганини қариндошлар талаби деб атади. Бироқ марҳумнинг отаси М.Қирғизбоев бу фикрни мутлақо инкор этди.
Шунингдек, Бунёд Юнусов тиббиёт бирлашмасида бир ойда 20-22 кун давомида навбатчилик қилиши маълум қилинган. Журналистлар билан суҳбатлашган яна бир бемор туманда тузалмагани, вилоятда бориб даво топганини айтган.
Ҳозирда прокуратура томонидани текширув олиб борилмоқда. Барча далил ва ҳужжатлар экспертизага юборилган.
