Apple компаниясининг келгуси авлод смартфонлари – iPhone 17 серияси сўнгги беш йил ичидаги энг катта дизайн ўзгаришларига эга бўлади. Шу билан бирга, флагман модели iPhone 17 Pro олд томондан ўз ўтмишдошига жуда ўхшаш бўлади. Бу ҳақда “Bloomberg” нашри шарҳловчиси Марк Гурман маълум қилди.
2020 йилдаги iPhone 12 тақдимотидан бери Pro версияларининг ташқи кўриниши деярли ўзгармаган. iPhone 13 Pro ва 14 Pro худди шундай дизайнни сақлаб қолди, iPhone 15 Pro эса алюминий рамка ўрнига титан корпус билан ажралиб турди. Жорий iPhone 16 Pro эса алоҳида камера бошқарув тугмаси ва янги ранглардан ташқари, деярли ўзгаришсиз қолди.
Бироқ iPhone 17 сериясининг чиқиши 2020 йилдаги 5G қўллаб-қувватлови жорий этилганидан кейинги энг муҳим ўзгаришларни олиб келади. Apple кам танилган Plus версияси ўрнига янги, жуда ингичка Air моделини тақдим этиши кутилмоқда.
Шу билан бирга, Гурманнинг таъкидлашича, iPhone 17 Pro модели олд томондан ўз ўтмишдошига жуда ўхшаш бўлади, аммо орқа томони бутунлай бошқача кўринишга эга бўлади. Интернетда тарқалган рендерларга кўра, бу моделда аввалги квадрат элемент ўрнига, орқа панелнинг деярли бутун кенглигини эгаллайдиган тўртбурчак шаклидаги камера модули бўлади.
Расмларда икки хил рангдаги дизайн кўрсатилган бўлиб, унда қора оптика блоги кумушранг корпус билан контраст ташкил этади. Бироқ “Bloomberg” нашрининг компаниядаги манбаларига таяниб хабар беришича, Apple ҳозирча бундай концепциядан воз кечади – камера соҳаси корпуснинг қолган қисми билан бир хил рангда бўлади.
