2025 йил 19 майда қабул қилинган Ўзбекистон Республикасининг 1066-сонли Қонунига мувофиқ, айрим қонун ҳужжатларига ўзгартириш ва қўшимчалар киритилди.
Ушбу қонун билан «Фуқароларнинг давлат пенсия таъминоти тўғрисида»ги Қонунга ёшга доир пенсия олиш ҳуқуқига эга бўлган фуқароларга уларнинг мурожаатисиз, яъни проактив шаклда пенсия тайинланиши ҳамда бундай ҳолда фуқароларда тайинланган пенсияни рад этиш ҳуқуқи назарда тутилган.
Киритилган қўшимчаларга кўра, фуқаронинг пенсияга чиқиш ҳуқуқи тегишли ахборот тизимларидаги маълумотлар асосида автоматик аниқланади.
Агар фуқаро проактив шаклда тайинланган пенсия миқдоридан норози бўлса ёки меҳнат фаолиятини давом эттириш ва кейинроқ пенсияга чиқиш истагини билдирса, у тайинланган пенсиядан воз кечиш ҳуқуқига эга.
Бунда фуқаро Пенсия жамғармаси бўлимига, давлат хизматлари марказига ёки ЯИДХП (my.gov.uz) орқали хабарномани олган кундан бошлаб 10 кун ичида мурожаат қилиши лозим.
Пенсия тайинлаш тўғрисидаги ариза ёки сўровнома 10 кун муддатда кўриб чиқилади.
Фуқаронинг мурожаатини талаб этмаган ҳолда, пенсияни проактив шаклда тайинлаш масаласи у пенсия ёшига етган кунининг ўзида кўриб чиқилади.
