Дунёнинг энг бой шахсларидан бири, машҳур тадбиркор Илoн Маск сиёсий фаолиятни тарк этишга қарор қилди. У бу қарорини натижага эришишдаги мураккабликлар, молиявий ва хавфсизлик таҳдидлари, шунингдек, Tesla компаниясига эътиборни кучайтириш истаги билан изоҳлади.
Маск бу ҳафтанинг бошида сиёсатдан узоқлашишини эълон қилди. Қатар Иқтисодий форуми олдидан Bloomberg агентлигига берган интервьюсида: “Менимча, етарлича иш қилдим”, — дея сиёсатга энди камроқ вақт ажратишини ва асосий эътиборни Tesla бошқарувига қаратишини айтди.
The Washington Post нашрининг ёзишича, Маскнинг сиёсатдан кетишига унинг сўнгги йиллардаги фаолияти сабаб бўлган. Манбаларга кўра, у сиёсат орқали аниқ натижаларга эриша олмасликдан ва шахсий маблағлари сиёсий тизимда сезиларли таъсир кўрсатмаслигидан хафсаласи пир бўлган. Шунингдек, Маск ўзининг ва оила аъзоларининг хавфсизлигидан жиддий хавотирга тушган.
NBC Newsнинг қайд этишича, Маск АҚШ Ҳукумати Самарадорлиги департаменти (DOJ) раҳбари бўлганидан сўнг, Tesla объектларига қарши “ҳужумлар тўлқини” кузатилган. Бир неча ҳафта давомида компаниянинг автомобиллари, дилерлик марказлари ва қувватлаш шохобчаларига нисбатан 10 дан ортиқ вандализм ҳаракати содир этилган. Доналд Трамп бундай ҳужумларни амалга оширганларни “террорчи” деб атаган.
Маскнинг сиёсий позицияси ва Трампга яқинлиги кўплаб танқидларга сабаб бўлди. У 2024 йилги президентлик кампаниясида Трампнинг энг йирик донорларидан бири бўлиб, кампанияга 250 миллион доллардан ортиқ маблағ сарфлаган. Шу орада, Маскнинг сиёсий фаолияти Tesla акцияларига ҳам салбий таъсир кўрсатган: агар 2024 йилда компания акциялари 60 фоизга ошган бўлса, 2025 йилдан бошлаб улар 55 фоиздан кўпроқ қийматини йўқотган.
“Капитолий тепалигидаги сиёсат энди самарали эмас. Энди, вақтдан ютганимиздан сўнг, келинг, шунчаки Марсга учиш масаласига қайтайлик”, — дея Маск атрофидагилардан бири сўзларига иқтибос келтирган The Washington Post.
