Қирғизистоннинг Ўш шаҳрида “TURKSOY” халқаро ташкилоти ташаббуси билан буюк қирғиз шоири Жолон Мамитовнинг 85 йиллигига бағишлаб халқаро шеърият фестивали ўтказилди. Унда ўзбек шоири Фахриддин Ҳайит ижоди билан катта эътибор марказида бўлди.
Ўзбекистон, Қозоғистон, Қирғизистон, Туркия, Озарбайжон, Туркманистон ва Венгриядан ташриф буюрган 50 га яқин ёш ижодкорлар иштирок этган мазкур нуфузли анжуманда Фахриддин Ҳайит Қирғизистон Миллий ёзувчилар уюшмасига аъзо этиб қабул қилинди.
Бир неча йиллардан буён қозоқ, қирғиз, турк ва озарбайжон адабиётини ўзбек тилига маҳорат билан таржима қилиб келаётган шоир ушбу фестивалда ҳам алоҳида эътирофга сазовор бўлди. Жолон Мамитовнинг шеърлари айнан Фахриддин Ҳайит таржимасида асосий дастурда ўқилди.
Адабиётшунослар бу таржималарни юқори баҳолаб, “Жолон Мамитов шеърлари Фахриддин Ҳайит таржимасида қайта туғилгандай бўлди”, дея таъкидлашди.
