27 июнь — Матбуот ва оммавий ахборот воситалари ходимлари куни муносабати билан Ўзбекистон Президенти Шавкат Мирзиёев журналистлар, нашриётчилар, ахборот хизматлари ва медиа соҳасида фаолият юритаётган барча мутахассисларни табриклаб, махсус табрикнома йўллади.
Президент ўз табригида бугунги мураккаб ва тез ўзгараётган дунёда оммавий ахборот воситалари роли беқиёс аҳамият касб этиб, холис ва ҳаққоний ахборот тарқатиш, миллий манфаатларни ҳимоя қилишда журналистларнинг хизмати юксак баҳога лойиқ эканини таъкидлади.
Мирзиёев медиа соҳасидаги ютуқларга тўхталар экан, Ўзбекистонда 2 400 га яқин ОАВ фаолият юритиши, уларнинг 65 фоизи нодавлат эканини, ахборот ресурсларидан фойдаланувчилар сони 32,7 миллионга етганини таъкидлади. Миллий контентни ривожлантириш, айниқса, ёшлар ва болалар учун мўлжалланган материаллар яратишга алоҳида эътибор қаратилмоқда.
Президент янги журналистлар авлоди етишиб чиқаётганини қувонч билан қайд этиб, уларнинг хорижий тиллар ва IT технологияларини ўзлаштираётгани замонавий журналистиканинг муҳим белгиси эканини қайд этди.Ушбу байрам муносабати билан “Олтин қалам” миллий мукофоти илк бор айнан 27 июнь куни тантанали тарзда топширилаётгани маълум қилинди. Президент барча ғолиблар ва давлат мукофотларига сазовор бўлган соҳа вакилларини самимий табриклади.
Мирзиёев ахборот майдонида холислик, қонун устуворлиги, танқидий таҳлил, коррупцияга қарши кураш ва ахборот маданиятини шакллантиришдек долзарб вазифалар борасида ҳам ҳали олдинда кўп иш борлигини таъкидлади.
“Сизларнинг машаққатли меҳнатингиз — Ватан хизматидир,” дейди Президент ўз табригида ва барча ОАВ ходимларига соғлик, муваффақият ва баракали фаолият тилади.
