Президент раислигида йўл ҳаракати хавфсизлигини таъминлаш ва тирбандликни камайтириш бўйича видеоселектор йиғилиши бошланди.
Унда таъкидланишича, охирги 7 йилда бу борада кўп ишлар қилинган. Жумладан, йўлларни қуриш ва таъмирлашга 61 триллион сўм ажратилган. Бу 2017 йилгача берилган маблағлардан 3,5 баробар кўп.
Онлайн мурожаат тизими ишга туширилганидан сўнг йўл ҳаракати хавфсизлиги бўлинмаларига келиш 50 фоизга камайган.
Шунингдек, 3 минг 365 нафар ЙҲХХ ходимига электрон планшет ва бодикамера олиб берилган. Қоидабузарликларни сунъий интеллект асосида саралаш ва қарор чиқариш амалиёти жорий қилинган.
Хабарда айтилишича, шаҳарларда жамоат транспорти учун махсус йўлаклар ташкил қилинган ва ҳайдовчиларга ҳам бир қатор енгилликлар берилган. Жумладан:
- Биринчи бор ҳуқуқбузарлик қилганларни жазолаш эмас, огоҳлантириш тартиби йўлга қўйилган,
- йўл чизиқларини босиш ҳолатларини камера орқали фиксация қилиш бекор қилинган,
- жамоат транспорти учун мўлжалланган тасмаларда кечқурун бошқа ҳайдовчилар ҳам юришига рухсат берилган,
- радар бор жойда йўл белгисини ўрнатиш мажбурий бўлди,
- шаҳарларда йўлларни кундузи таъмирлаш тақиқланди.
Шу билан бирга, мажлисда давлат раҳбари соҳада ўз ечимини кутаётган масалалар кўплигини қайд этган.
Мамлакатда йўл-транспорт ҳодисалари оқибатидаги зарар ялпи ички маҳсулотга нисбатан ўртача 0,4 фоизни ташкил қилаётгани кўрсатиб ўтилган.
Ўтган йили 9 минг 364 та йўл-транспорт ҳодисаси содир бўлган. Ушбу мудҳиш ҳодисаларда қарийб 9 минг фуқаро жароҳат олган.
Энг ачинарлиси, авариялар туфайли 2 минг 203 нафар одам ҳалок бўлган. Энг кўп ўлим ҳолатлари Самарқанд, Тошкент ва Фарғона вилоятларида, дейилади хабарда.
