Россияда янги тартиб кучга киргач, рус тилидан имтиҳонни топшира олмаган мигрант болалар мактабга қабул қилинмаяпти. Новосибирск шаҳрида тестдан ўтган 70 нафар чет эллик боланинг фақат 39 нафари керакли натижани кўрсата олган, қолган 31 нафари эса синовдан йиқилган.
Бу ҳақда шаҳар таълим бошқармаси бошлиғи Рамил Ахметгареев маълум қилган. Унинг айтишича, 77-, 91- ва 167-мактабларга ҳужжат топширган биринчи синфга борувчи болалар орасида кўпчилиги рус тилини етарли даражада билмаслиги аниқланган. Имтиҳондан йиқилган болалар фақат уч ойдан сўнг қайта уриниб кўришлари мумкин бўлади.
2025 йил 1 апрелдан Россияда кучга кирган қонунга кўра, энди барча мигрантлар ва фуқаролиги бўлмаган шахсларнинг фарзандлари рус тилидан имтиҳон топшириши шарт. Акс ҳолда, улар на бошланғич, на ўрта мактабларга қабул қилиниши мумкин эмас.
Қонун муаллифларидан бири — Давлат Думаси спикери ўринбосари Ирина Яровая: «Мактаб ўқувчини тайёрламаслиги, балки ўқитиши керак», деб таъкидлаган ва мигрантларга фарзандларини тайёр ҳолатда олиб келишни тавсия қилган.
Ички ишлар вазири ўринбосари Игор Зубовнинг маълумотига кўра, ҳозир Россияда 638 мингга яқин вояга етмаган хорижлик бола бор. Уларнинг бир қисми мактабга бормаслиги мумкин, аммо бу кўрсаткич йилдан-йилга камайиб бормоқда.
Мутахассислар фикрича, энди ҳар бир мигрант фарзандининг Россияда таълим олиши учун рус тилини етарли даражада билиши шарт. Бу мажбурий талаблардан бирига айланган.
