Бухоро вилоятининг Когон шаҳрида яшовчи фуқаро Виктор Кузеев оилавий жанжал туфайли ўғлининг турмуш ўртоғини ошхона пичоғи билан жароҳатлаб, ўлимига сабаб бўлди.
Аслида воқеа 2024 йилнинг охирида содир бўлган эди.
Азалдан спиртли ичимликлар истеъмол қилиб юрадиган 68 ёшли Виктор Кузеев қўни-қўшнилар ва оила аъзолари билан тез-тез жанжал ва келишмовчиликларга бориб турган.
Кунларнинг бирида у ўғли Дима Кузеевнинг турмуш ўртоғи Дилнура Исломова билан ҳам ўзаро тортишиб қолган. Оғзаки тортишувдан чарчаган келин подъезд ва йўлакларни тозалаш учун кўчага чиқиб кетади. Қайтиб келганда эса эшик ичкаридан қулфланган эди. Маълум бўлишича, қайнотаси уни уйдан ҳайдамоқчи бўлган ва бир неча соат давомида эшикни очмаган.
«Қаердан келган бўлсанг, ўша ерга кет!» – дея бақириб, Дилнурани ҳақорат қилган.
Орадан вақт ўтиб, қайнота эшикни очиб, келинни ичкарига киритади. Аммо, сабабсиз ичкарига кирган келин билан жанжаллаша бошлайди. Жаҳли чиққан келин қайнотасини итариб юбориб, уни ўқлов билан ура бошлаган. Спиртли ичимлик таъсирида бўлган қайнота ўзини ҳимоя қилиш учун ошхона пичоғини олиб, келинига ташланган. Пичоқ билан келинининг қорин ва қорин усти қисмига шафқатсизларча урган. Натижада яраланган Дилнура судралганча ёрдам сўраб, кўчага чиқади.
Жабрланувчига тезкор тиббий ёрдам кўрсатилиши ва муолажалар олиб борилишига қарамай, у касалхонада вафот этган.
«Қилмишимдан пушаймонман, соғлиғимнинг ёмонлиги, нафақахўр эканлигимни инобатга олиб, менга нисбатан адолатли қарор чиқаришингизни сўрайман», – деган қайнота суд-тергов жараёнларида.
Айбдор Жиноят кодексининг 97-моддаси (қасддан одам ўлдириш) билан айбдор деб топилиб, жиноят ишлари бўйича Когон шаҳар суди ҳукми билан 7 йил муддатга озодликдан маҳрум этилган.
