Олий Мажлис Қонунчилик палатаси “Ўзбекистон Республикасининг Маъмурий жавобгарлик тўғрисидаги кодексига қўшимчалар киритиш ҳақида”ги қонун лойиҳасини иккинчи ўқишда қабул қилди.
Ҳужжатда сўнгги пайтларда ноқонуний олиб кириш ва ишлатиш ҳолатлари кўпайиб бораётган портатив лазер нурлантирувчиларнинг ноқонуний айланмаси учун жавобгарлик белгиланиши кўзда тутилган.
Қоидабузарликнинг характерига қараб, қуйидаги миқдорда жарималар қўлланилади:
- ноқонуний фойдаланиш учун — 15–25 БҲМ (6,1–10,3 млн сўм);
- ишлаб чиқариш, сақлаш ва тайёрлаш учун — 15–30 БҲМ (6,1–12,3 млн сўм);
- мамлакат ҳудудига олиб кириш учун — 25–50 БҲМ (10,3–20,6 млн сўм).
Қонун лойиҳаси ушбу қурилмалар айланмаси устидан назоратни кучайтириш ва ҳуқуқбузарликларнинг олдини олиш мақсадида ишлаб чиқилган. Уни депутатлар гуруҳи тайёрлаган бўлиб, энди Сенатга кўриб чиқиш учун юборилади.
