Ижтимоий тармоқларда кўплаб муҳокамаларга сабаб бўлган Самарқанддаги ноодатий меҳмонхона ниҳоят бузилмоқда
Бундан 3 йил олдин Қурилиш вазирлиги ушбу меҳмонхона ҳақида тарқалган хабарлардан сўнг ҳолатни ўрганиб Самарқанд вилояти Самарқанд тумани «Жўйисой» маҳалласида фуқаро Ф.Ҳалилов томонидан ўз уйининг бир қисмини бузиб, 21,4×12,6 метр ўлчамдаги 11 қаватли 2 қават ертўлали меҳмонхона биноси қурилиши ҳеч қандай қурилишга рухсат берувчи шаҳарсозлик ҳужжатлари расмийлаштирилмасдан амалга оширганини айтган эди.
Шунингдек хабарларда қурилишга рухсат берувчи Самарқанд тумани ҳокимининг қарори ёки туман қурилиш бўлимининг рухсатномаси мавжуд эмаслиги, архитектура режалаштириш топшириғи (АПЗ) мавжуд эмас, муҳандислик геологияси, лойиҳа-смета ҳужжатлари тўлиқ ишлаб чиқилмаган ҳамда тасдиқланмаган, белгиланган тартибда шаҳарсозлик кенгашидан ўтмаганлиги айтилган.
Қурилиш 2012 йилда бошланган ва тадбиркор унга 3 миллион доллар пул сарфланган, лойиҳа архитектори япониялик бўлган ва қурилишни битта корхона бошидан охиригача амалга оширган. Хабарларга кўра, меҳмонхона эгаси 10 йилдан буён давом этаётган қурилишга рухсат олишга кўп марта ҳаракат қилгани, аммо доим мужмал жавоб олганини айтган. Ушбу бино ҳақида охирги вақтларда кетма-кет блогерлар ва ижтимоий тармоқ фаоллари ёза бошлагач, расмий идоралар муносабат билдирди.
Бино қурилиши 10 йил аввал бошланган ва Самарқандда жуда машҳур бўлган бино тақдири кўп йиллардан буён муҳокама қилинаётган эди. Қонунчиликка кўра, бирор бино бузилиши учун тегишли суд қарори бўлиши талаб қилинади. Ҳокимлик тадбиркорни 2016 йилда судга берган ва тадбиркорнинг айтишича, иш кўрилмай қолдирилган. Яқинда ижтимоий тармоқларда тарқалган видеоларда бинонинг бузилиш ишлари бошланганини кўриш мумкин.
