“Laxisam” компанияси асосчиси Шавкат Исмоилов мамлакатдаги фармацевтика тармоғидаги муаммолар юзасидан жамоатчиликка мурожаат қилди ва соҳадаги масъул идораларни — хусусан, Фармацевтика тармоғини ривожлантириш агентлиги (Фармқўмита) ҳамда “Ўзфармсаноат” уюшмасини кескин танқид остига олди.
Исмоиловнинг таъкидлашича, бу ташкилотлар томонидан амалга оширилаётган сиёсат натижасида соҳа таназзулга юз тута бошлаган.
“Фармқўмита, Фармпром раисига мурожаат қилмоқчиман: эй, кўзингизни очинглар, қаранглар, қачонгача қийнайсизлар? Ҳаммасининг гапи бир: сифатни кучайтириш, такомиллаштириш. Шиори бошқа, қиладиган иши бошқа”, — деди у.
Исмоилов Фармқўмита ва Фармпромнинг иш услуби ўзгармас экан, фармацевтика саноати жиддий хавф остида қолишини таъкидлади:
“Фармкомитет, Фармпром иш услубини тубдан ўзгартирилмаса, фалокатга боради фарм саноати. Ёки ишланглар, ёки жойни бўшатиб қўйинглар”, — дея кескин баёнот берди у.
Шунингдек, у компаниясининг имкониятлари сезиларли даражада қисқартирилганини маълум қилди. Айни пайтда ишчи сони аввалгига нисбатан 10 баробарга камайган, вилоятлардаги филиаллар эса ёпилган.
“Бизнинг вилоятларда филиаллар бор эди, ҳар бир вилоятда. Ҳозир ёпилиб кетган. Бу — Фармқўмитанинг олиб бораётган нотўғри сиёсати, деб биламан. Иш жойи ташкил қилиш ўрнига иш жойлари ёпилиб кетяпти. Дори-дармонлар аҳолидан қочяпти. Бу нима деган гап, ахир?” — деди Исмоилов.
