Камчатка ҳудудаги Крашенинников вулқони бир неча асрлик сукунатида кейин илк бор фаоллик кўрсатди. Бу ҳақда Вулкан отилишларига жавоб берадиган Камчатка гуруҳи (KVERT) ҳамда РАН Узоқ Шарқ бўлими Вулканология ва сейсмология институти маълум қилди.
Олимлар берган маълумотга кўра, отилиш 3 август куни маҳаллий вақт билан соат 04:50 да бошланган. Вулқон 4 километргача баландликда кул устунини ҳавога отган. Эътиборлиси, вулқоннинг ўзи 2 километрдан пастроқ баландликка эга. Тахминларга кўра, у охирги бор XV асрнинг ўрталарда отилган.
Кейинчалик маълум бўлишича, кул чиқариш янада кучайиб, 5–6 километр баландликкача етган. Кроноцкий қўриқхонасининг бир қисми кул билан қопланган. Кулли булут шарқий йўналишда 75 километрдан ортиқ масофага тарқалмоқда. Бу ҳолат паст баландликда парвоз қилувчи самолётлар учун хавф туғдириши мумкин.
Шунингдек, минтақадаги энг фаол вулқон — Ключевскойда ҳам отилиш кучайган. Жануби-ғарбий ёнбағир бўйлаб лавалар 2,7 километр масофага оқиб тушган. Ключевской вулқонининг баландлиги 4850 метрни ташкил қилади.
Бу отилишлар Камчаткада 30 июль куни содир бўлган кучли зилзиладан сўнг бошланган. Зилзиланинг магнитудаси 8,7 бўлиб, у 1952-йилдан бери минтақада қайд этилган энг кучлиси ҳисобланади. Унинг натижасида Шимолий Курилскда тўрт марта цунами тўлқинлари кузатилган. Цунами хавфи Япония, Гавайи, Чили, Эквадор, Перу, Мексика ва Хитойда ҳам эълон қилинган.
