Эронда аномал иссиқлик, сув сатҳи пасайиши ва электр узилишлари ортидан ҳукумат фавқулодда чоралар кўришга мажбур бўлмоқда.
Расмий маълумотларга кўра, мамлакатдаги 31 вилоятдан камида 15 тасида давлат идоралари бутунлай ёпилади ёки қисқартирилган иш жадвалига ўтади.
Бунга энергия истеъмолини камайтириш зарурати сабаб бўлган. Тегишли қарор Энергетика вазирлигининг сўровига биноан қабул қилинган ва сув ҳамда электр ресурсларидан фойдаланишни бошқаришга қаратилган.
Теҳрон, Ардабил, Хурмузгон ва Алборз вилоятлари бунга қўшилган. Фавқулодда ва муҳим хизматлар ишлашда давом этади.
Эрон Энергетика вазири Али Акбар Меҳрабианнинг айтишича, ҳаво ҳарорати одатдагидан кескин ошиб кетгани оқибатида мамлакатда электр энергияси истеъмоли 9 фоизга ошган – бу ҳокимият кутган энг ёмон сценарийдан ҳам юқори кўрсаткич.
Июль ойининг ўрталаридан бошлаб жанубий ҳудудларда ҳарорат 50 даражадан ошган. Бу эса бутун мамлакат бўйлаб электр тизимининг ҳаддан ташқари юкланишига ва кенг кўламли узилишларга олиб келган.
Шунингдек, сув омборларидаги сув миқдори камайгани сабабли Теҳронда сув босими ҳам камайтирилган. Маҳаллий ОАВ бу қурғоқчиликни сўнгги 100 йилдаги энг кучлиси деб атамоқда.
