Тошкент ҳокимияти 7-август оқшомида америкалик қўшиқчи ва актриса Женнифер Лопез иштирокидаги концерт бўлиб ўтадиган “Бунёдкор” стадионига барча кириш ва чиқиш нуқталари кўрсатилган схематик харитани эълон қилди. Бу ҳақда пойтахт ҳокимлиги расмий саҳифаларида хабар берилган.
Харитада барча кириш-чиқиш пунктлари ва ҳаракат йўналишлари акс эттирилган бўлиб, томошабинлар олдиндан маршрут билан танишиб чиқишлари ва шошилмасдан стадион ҳудудига киришлари, тадбирдан сўнг эса қулай тарзда уни тарк этишлари мумкин бўлади.
Ҳокимият хабарида қайд этилишича, ушбу харита чалкашлик ва одамлар тўпланишини олдини олиб, кириш ва чиқишда тартибли ўтказув тизимини таъминлашга хизмат қилади.
Anhor.uz аввалроқ Женнифер Лопез ўзининг Ўзбекистондаги илк концертини ўтказиш учун Тошкентга етиб келгани ҳақида хабар берганди. Кутилишича, ушбу концерт мамлакат бўйлаб минглаб томошабинларни тўплайди.
