Президентга суд тизимини такомиллаштириш ва одил судловни таъминлашга қаратилган таклифлар намойиш қилинди.
Тақдимотда ривожланган давлатлар тажрибаси асосида ишлаб чиқилган “Рақамли суд” концепцияси кўрсатилди. Ушбу ёндашув коррупциянинг олдини олиш, фуқаролар ва тадбиркорларга оворагарчиликсиз одил судловга эришиш имкониятларини кенгайтириши таъкидланди.
Шунингдек, фуқаролик ва иқтисодий судлардаги айрим низосиз ишлар маъмурий органлар ваколатига ўтказилиши, суд жараёнларини масофадан туриб ва экстерриториал тартибда кўриш амалиётини жорий этиш таклиф қилинди.
Шу билан бирга, судьяликка тайинлаш муддатларини қайта кўриб чиқиш, минтақавий тафтиш судларини йўлга қўйиш ҳамда Судьялар олий мактабини ислоҳ этиб, унинг негизида Одил судлов академиясини ташкил этиш режаси ҳам билдирилди.
