Ўзбекистон Республикаси Президентининг тегишли қарорига кўра, Бобоев Алишер Шукруллаевич Соғлиқни сақлаш вазирининг биринчи ўринбосари лавозимига тайинланди.
Алишер Бобоев 1996 йилда Тошкент давлат тиббиёт институтини тамомлаб, клиник ординатура йўналишида таҳсил олган. Меҳнат фаолиятини 1998 йилда ушбу институтда катта лаборант сифатида бошлаган.
У турли йилларда Тошкент фармацевтика институти тиббий-биологик фанлар кафедрасида катта лаборант, Тошкент шаҳар Олмазор тумани кўп тармоқли марказий поликлиникаси, 1-сонли Республика клиник шифохонаси маслаҳат-диагностика поликлиникаси ва Республика клиник шифохонаси урология бўлимида шифокор-уролог сифатида меҳнат қилган. Шунингдек, Соғлиқни сақлаш вазирлиги котибиятида бош мутахассис лавозимида ҳам ишлаган.
II даражали “Саломатлик” ордени соҳиби бўлган Алишер Бобоев тайинловга қадар Қашқадарё вилояти Соғлиқни сақлаш бошқармаси бошлиғи сифатида фаолият юритиб келаётган эди.
