АҚШ президенти Доналд Трамп маъмурияти Ички хавфсизлик вазирлигининг қарор лойиҳасини тақдим этди. Унда айрим турдаги визалар муддати қисқартирилиши кўзда тутилган.
Ҳужжатга кўра:
Талабалик визалари (Ф) ва маданий алмашинув қатнашчилари визалари (Ж) муддати 4 йил билан чекланади.
Журналистлик визалари (И) эса энг кўпи 240 кунлик бўлади. Хитой фуқаролари учун бу муддат 90 кунга туширилади. Шундан сўнг хорижликлар муддатни узайтириш учун ариза топширишлари мумкин.
1978-йилдан буён АҚШда талабаларга визаси бутун ўқиш даври учун амал қилиб келган, қанча давом этишидан қатъи назар. Хорижий журналистлар эса мамлакатда ўз сафарлари давомида, аммо кўпи билан 10 йилгача ишлашлари мумкин эди.
АҚШ ҳукумати маълумотига кўра, 2024-йилда мамлакатда 1,6 миллион хорижий талаба бўлган. Йил бошидан эса 355 мингта алмашинув визаси ва 13 мингта журналистлик визаси берилган.
Изоҳда қайд этилишича, ташаббус хорижликларнинг мамлакатда қолишини янада қатъий назорат қилишга қаратилган. Хитой Ташқи ишлар вазирлиги бу чорани “камситувчи” деб баҳолаган.
Ҳужжат 30 кунлик жамоатчилик муҳокамасига қўйилади. Ўхшаш ташаббус Трамп маъмурияти томонидан 2020-йилда ҳам илгари сурилган, аммо 2021-йилда демократ президент Жо Байден уни бекор қилганди.
