Бокс бўйича Жаҳон чемпионати ва Олимпиада ғолиби Муҳаммадқодир Абдуллаевнинг 25 йил давомида ечим топмаган муаммоси суд орқали ҳал этилди.
Маълумотларга кўра, спортчига 2000 йилда Олтинкўл тумани ҳокими қарори билан ер майдони ажратилган. Бироқ ордан чорак аср ўтса-да, у ерга кадастр ҳужжатларини ололмаган. Абдуллаев ушбу майдонда бокс мактаби қуриш нияти борлигини билдирган.
Суд жараёнида спортчининг адвокати ҳоким қарори, ширкат хўжалиги баёноти ва йиллар давомида тўлаб келинган солиқлар бўйича барча далилларни тақдим этди. Жавобгар томон эса 2000 йилги қарор ерга эгалик ҳуқуқини таъминламайди, деган асосда сўровни рад этиб келган.
Андижон туманлараро суди якуний қарорга кўра, Муҳаммадқодир Абдуллаевнинг даъвосини қаноатлантирди ва Давлат кадастрлар палатасига унинг талабини бажариш вазифасини юклатди.
