Британиялик собиқ жарроҳ Нил Хоппер фирибгарлик учун 32 ойга озодликдан маҳрум этилди. У суғурта компанияларига оёқларининг ампутация сабаби ҳақида ёлғон маълумот берган ва 466 минг фунт стерлингдан ортиқ пул олган.
Хоппер оёқларини сепсис сабаб ампутация қилишга тўғри келганини иддао қилган. Аслида эса, у 2019 йилда атайин уларни музлатиб, яроқсиз ҳолга келтирган. У суғуртадан олган пулни автофургон, жакузи, ўтин печи ва уйини таъмирлашга сарфлаган.
Полиция Мариус Густавсон ишини тергов қилиш чоғида Хоппернинг изига тушган. Густавсон тананинг экстремал модификацияларини ташкил қилгани учун умрбод қамоқ жазосига ҳукм қилинган зарали оқим етакчиси эди. Хоппер у билан алоқада бўлиб, унинг кўрсатмаларига амал қилган ҳолда ўзига жароҳат етказган. Суд собиқ шифокорга фирибгарлик учун 22 ой, тақиқланган материалларни сақлагани учун эса 10 ой қамоқ жазоси тайинлаган.
Хоппернинг ҳимоячиси унда танасини нотўғри идрок этиш билан боғлиқ руҳий хасталик борлигини ва бу унинг соғлом оёқларини ампутация қилиш истагини келтириб чиқарганини таъкидлаган. Ҳибсга олингандан сўнг, Хоппер ишдан бўшатилган ва тиббий реестрдан ўчирилган. Кейинчалик тиббиёт хизмати унинг жиноятлари профессионал фаолияти билан боғлиқ эмаслигини айтган. Бироқ, The Guardian нашрининг ёзишича, Хоппернинг айрим беморлари, жумладан, оёқ-қўллари ампутация қилинганлар, аллақачон тиббий хатолар бўйича юристларга мурожаат қилишган.
