Туркия ҳукумати 16 ёшгача бўлган болалар ва ўсмирларнинг ижтимоий тармоқлардан фойдаланишини тақиқлаш тўғрисида қарор қабул қилди. Ушбу чора ёшларни интернетдаги рақамли таҳдидлар ва зарарли контентдан ҳимоя қилиш мақсадида ишлаб чиқилган бўлиб, болаларни жиноятдан ҳимоя қилиш ва уларнинг хавфсиз онлайн муҳитини таъминлашга оид қонунларга тегишли ўзгартиришларни ўз ичига олади.
Расмий маълумотларга кўра, 16 ёшгача бўлган фойдаланувчилар ижтимоий тармоқларда аккаунт яратиши ва фаолият юритиши бутунлай ман этилади. Шу билан бирга, ёшни текшириш ва хавфли контентни фильтрдан ўтказиш механизмлари жорий қилиниши кўзда тутилмоқда.
Мутаҳассислар таъкидлашича, бу ташаббус нафақат Туркияда, балки Европада ҳам кенг тарқалган тенденциянинг бир қисмидир. Масалан, Буюк Британияда 2025 йил июлидан бошлаб ижтимоий тармоқ фойдаланувчиларининг ёшини текшириш мажбурияти жорий этилган, Франция, Испания ва Грецияда эса шунга ўхшаш ташаббуслар кўриб чиқилмоқда.
Мазкур чора ёшларнинг рақамли муҳитдаги хавфсизлигини мустаҳкамлаш ва уларнинг соғлом ривожланиши учун қўшимча кафолат яратишга хизмат қилиши кутилмоқда.
