Киев вилоятида ўзбекистонлик фуқароларни мажбурий меҳнатга жалб қилган жиноий гуруҳ фош этилди. Украина Бош прокуратураси маълумотига кўра, Хитойнинг икки фуқароси, бир ўзбекистонлик ва бир украиналик қўлга олинган.
Тергов маълумотларига кўра, гумонланувчилар ишга ёллаш ваъдаси билан 13 нафар ўзбекистонликни Киев вилоятига олиб келиб, ғайриинсоний шароитда меҳнатга мажбур қилган.
Жабрланувчиларнинг айтишича, улар яшаган жойларда таҳқирловчи тартиблар ўрнатилган: ҳожатхонага ҳам фақат жадвал асосида боришга рухсат берилган, қоидабузарликлар учун эса жазолар қўлланилган.
Ҳуқуқ-тартибот органлари томонидан гумонланувчиларнинг яшаш жойлари ва хўжалик объектларида тинтувлар ўтказилган. Натижада 13 нафар ўзбекистонлик сақланаётган хоналар, ҳужжатлар, пул маблағлари ва транспорт воситалари аниқланган.
Ҳозирда гумонланувчиларга нисбатан жиноят иши қўзғатилган ва тергов давом этмоқда.
