АҚШ президенти Доналд Трамп 2021-йилдан бери “Толибон” ҳаракати бошқараётган Афғонистондан, АҚШ қўшинлари чиқиб кетгач бўшаган Баграм авиабазасини Вашингтонга топширишни талаб қилди.
«Агар Афғонистон авиабазани уни қурганларга — Америка Қўшма Штатларига қайтармаса, ёмон нарсалар юз беради», — деб ёзди Трамп Truth Social‘да. Кейинроқ Оқ уй ёнида журналистлар билан суҳбатда у қўшимча қилди: «Агар улар буни қилмаса, мен нима қилишимни билиб оласизлар».
1950-йилларда қурилган ва Кобулдан 60 км узоқликда жойлашган Баграм авиабазаси турли даврларда совет қўшинлари томонидан, кейинчалик эса 2001-йил 11-сентябрь воқеаларидан сўнг АҚШнинг асосий таянч пункти сифатида ишлатилган. 2012-йилда бу базадан 100 мингдан ортиқ америкалик ҳарбий ўтган. АҚШ 2021-йилда объектни тарк этган эди.
19-сентябрь куни Буюк Британия бош вазири Кир Стармер билан матбуот анжуманида Трамп Баграмни «дунёдаги энг қудратли базалардан бири» деб атади ва унинг Хитой яқинидаги стратегик жойлашувини алоҳида таъкидлади. Шунингдек, у Жо Байден маъмуриятини қўшинларни «фалокатли тарзда» олиб чиқишда айблади.
The Wall Street Journal маълумотларига кўра, гап базага терроризмга қарши операциялар учун чекланган контингентни қайтариш ҳақида бўлиши мумкин. Бироқ Афғонистон Ташқи ишлар вазирлиги бу ташаббусни рад этди, мамлакат ҳеч қачон АҚШнинг ҳарбий иштирокига рози бўлмаганини, аммо сиёсий ва иқтисодий ҳамкорликка тайёрлигини таъкидлади.
Собиқ ва амалдаги америкалик амалдорлар Реутерсга берган изоҳларида Трампнинг режаларини амалда Афғонистонга қайта бостириб киришга ўхшаши мумкинлигини билдиришди.
