2025 йил 19 сентябрдаги Президент қарорига мувофиқ, коррупцияга қарши курашишда фуқаролик жамияти институтлари иштирокини кенгайтириш ва илмий тадқиқотларни қўллаб-қувватлаш учун янги тартиб жорий этилди.
Қарорга кўра, БМТнинг Коррупцияга қарши конвенцияси қоидаларини бажаришда нодавлат нотижорат ташкилотлар (ННТ) жалб этилади ва улар томонидан муқобил баҳолаш тизими йўлга қўйилади.
ННТларнинг коррупцияга қарши йўналишдаги лойиҳаларига ҳар йили 10 млрд сўм миқдорида грант ва ижтимоий буюртмалар ажратилади.
Коррупцияга қарши курашиш агентлиги ННТлар билан ҳамкорликда тренинглар ташкил этади ва маиший коррупция ҳолатларини ўрганиш бўйича ижтимоий сўровлар ўтказади.
Шунингдек, қарорга биноан “Коррупцияга қарши курашиш муаммолари бўйича минтақавий тадқиқот маркази” ташкил этилиб, коррупция ҳолатларини илмий тадқиқ этиш, ҳалоллик стандартларини жорий қилиш ва халқаро тажрибани татбиқ этиш билан шуғулланади.
Ушбу қарор мамлакатимизда коррупцияга қарши курашиш ишларининг самарадорлигини ошириш, фуқаролик жамияти институтлари иштироки ва халқаро ҳамкорликни кенгайтиришда муҳим қадам бўлиб хизмат қилади.
