Эквадорда ҳукуматнинг дизел ёқилғисига берилаётган субсидияларни бекор қилиш қарорига қарши оммавий норозилик намойишлари давом этмоқда. Шу воқеалар фонида мамлакат президенти Даниел Нобоа кортежига ҳужум уюштирилди.
Ҳодиса саккиз кундан бери давом этаётган иш ташлашлар кузатилаётган Котакачи шаҳрида содир бўлган. Нобоанинг сўзларига кўра, гуманитар ёрдам ортилган машиналар ва хорижий дипломатлар ҳам бўлган кортежга қарийб 350 киши ҳужум қилган. Улар транспорт воситаларига мушаклар, «Молотов коктейллари» ва тошлар улоқтирган.
Эквадор президенти бу ҳақда ижтимоий тармоқ Х‘даги саҳифасида маълум қилиб, ҳужум нафақат унинг ҳаётига, балки кортежда бўлган дипломатлар хавфсизлигига ҳам таҳдид солганини таъкидлаган.
CNN маълумотларига кўра, норозиликлар ҳукуматнинг дизел субсидия дастурини тўхтатиш қарори ортидан бошланган. Ҳукуматнинг фикрича, бу чора давлат харажатларини қисқартириш, ёқилғи контрабандаси ҳажмини камайтириш ва ижтимоий дастурлар учун маблағ ажратишга хизмат қилади.
Маълум қилинишича, 12 сентябрь куни Эквадор ҳукумати дизел субсидияларини расман бекор қилган. Тежалган маблағлар аҳолининг энг заиф қатламларини қўллаб-қувватлашга йўналтирилиши режалаштирилган. Бироқ бу қарор транспорт касаба уюшмаларининг норозилигига сабаб бўлди. Ҳайдовчилар иш ташлаб, йўлларни тўсиб қўйишди ва бу мамлакатдаги тарангликни кучайтирди.
Даниел Нобоа 2023 йил ноябридан буён Эквадор президенти сифатида фаолият юритмоқда. У Лотин Америкасидаги энг ёш амалдаги президент ва мамлакат тарихидаги иккинчи энг ёш раҳбар ҳисобланади.
