Ҳиндистоннинг Уттар-Прадеш штатида 35 ёшли Сачин исмли эркак шифохонага оғир ҳолатда олиб келинди. Унинг қорнида ўтказилган рентген ва компьютер томографияси натижасида врачлар ажабланарли ҳолатни аниқлашди — бемор ошқозонида 29 та пўлат қошиқ, 19 та тиш чёткаси ва 2 та ручка бор эди.
Маълум бўлишича, Сачин оиласи талабига кўра реабилитация марказига жойлаштирилган. Бироқ у ердаги шароитлардан қаттиқ норози бўлган: беморларга берилган овқат кам, яқинлари юборган озиқ-овқатлар эса кўпинча етиб бормаган.
Овқатдан норози бўлган Сачин ғалати йўл тутиб, марказдаги ошхона қошиқларини яширинча олиб, ваннада синиб қолган қисмларини оғзига солиб юта бошлаган. Шу билан чекланмай, тиш чёткалари ва ручкаларни ҳам худди шундай йўл билан ютиб юборган.
Бир неча кундан сўнг унинг қорни қаттиқ оғриб қолган. Шифокорлар текширув пайтида ошқозондаги кўп сонли бегона жисмларни кўриб, фавқулодда жарроҳлик амалиёти ўтказишга қарор қилишган. Мураккаб операция муваффақиятли ўтиб, барча жисмлар олиб ташланди.
Ҳозирда беморнинг аҳволи барқарорлиги хабар қилинган.
