Жиззах вилоятида 26-сентябрь куни эркак рафиқасига оғир тан жароҳати етказганлик учун тўрт йил озодликни чеклаш жазосига ҳукм қилинди, деб хабар бермоқда NeMolchi.uz.
Ҳодиса 2024-йил 25-октабр куни содир бўлган. Тонгда эркак ҳовлисидан машинаси йўқолганини сезган. Кейин маълум бўлишича, унинг ўғли ҳужжатсиз машина ҳайдагани учун ушланган ва жаримага тортилган. Бунга жаҳли чиққан эркак рафиқасини ўғлига машина калитининг захира нусхасини берганликда айблаб, унга металл чойнак билан ҳужум қилган.
Суд-тиббиёт экспертизаси хулосасига кўра, аёл ҳаёт учун хавфли бўлган оғир тан жароҳати олган. Суд эркакни Жиноят кодексининг 126-1-моддаси 6-қисми (“Оилавий зўравонлик”) бўйича айбли деб топган ва унга тўрт йил озодликни чеклаш жазосини тайинлаган. Унга яшаш жойини тарк этиш тақиқланиб, фақат иш билан боғлиқ ҳолларда чиқишга рухсат берилган.
Маҳкум апелляция шикоятида оилавий аҳволини инобатга олиб, жазони енгиллаштиришни сўраган. Бироқ суд ҳайъати биринчи инстанция қарорини ўзгаришсиз қолдирган, чунки суд аввалроқ айбни тан олганлик, пушаймонлик, илгари судланмаганлик, жабрланувчи билан ярашганлик ва вояга етмаган бола борлигини юмшатувчи омиллар сифатида ҳисобга олган эди.
