АҚШда 81 ёшли Фред Синглтон исмли маҳкум қатл жазосини кутиб, 42 йилни ўтказгандан сўнг табиий сабабларга кўра қамоқхона шифохонасида вафот этди. Бу ҳақда Associated Press агентлиги Жанубий Каролина штати жиноят-ижроия муассасалари департаменти маълумотига таяниб хабар берди.
Фред Синглтон 1983 йилда қотиллик, зўрлаш ва ўғирлик жиноятларида айбдор деб топилиб, электр стули орқали қатл этилишга ҳукм қилинган эди. Бироқ ҳукм 42 йил давомида ижро этилмади.
Бунга маҳкумнинг руҳий ҳолати сабаб бўлган — суд унинг жазо моҳиятини англаш қобилияти йўқлигини инобатга олган ва уни қатл этиш мумкин эмас, деган қарор чиқарган. Шу билан бирга, ҳукумат уни фақат қатлни амалга ошириш учун мажбурий равишда даволашга ҳам ҳақли эмас эди.
Оқибатда, Синглтон Жанубий Каролинадаги «ўлим камераси»да энг кўп вақт яшаган маҳкум сифатида тарихда қолди — у ё табиий ўлимни, ёки психиатрия соҳасидаги илмий ютуқни кутган.
Бундан олдин ҳам АҚШда шунга ўхшаш ҳолат кузатилган — 67 ёшли Ральф Мензис 1986 йилда аёлни ўғирлаб, ўлдиргани учун қатл этилиши керак эди. Аммо унинг ақлий саломатлиги ёмонлашгани сабабли жазо кечиктирилган. Суд тиббий комиссия хулосасига кўра, агар маҳкум воқеа-ҳодисаларни англамаса, қатлни бекор қилади.
Бундай қарорлар АҚШ суд амалиётида кенг тарқалган — агар маҳкум ўз қилмиши учун жазо олаётганини англай олмаса, жамият ҳам бундан адолат туйғусини ололмайди, деган тамойилга асосланилади.
