АҚШда дунёдаги энг оғир шафтоли етиштирилди. Бу гигант мева Гиннес рекордлар китобига киритилди.
Виржиния штатидаги боғда ишлаётган теримчилар дарахт шохида ғалати катта шафтолини кўриб, у рекорд қўйиши мумкинлигини дарҳол англашган. Кейин мутахассислар уни текшириб, расман ўлчашди ва дунёдаги энг оғир шафтоли сифатида эътироф этилди. Унинг вазни 830 граммни ташкил этди.
“Биз махсус равишда энг катта шафтоли етиштиришни мақсад қилмаган эдик. Бу йил табиат бизга идеал шароит берди, холос”,
— деди боғбон Генри Чилес UPI агентлигига берган интервьюсида.
Ушбу улкан мева тез орада маҳаллий аҳоли учун туристик жозиба нуқтасига айланди — Виржиниянинг кўплаб фуқаролари уни яқиндан кўриш ва суратга олиш учун боғга келмоқда.
Фермерлар таъкидлашича, бу рекорд улар учун кутилмаган совға бўлди. Улар учун асосий мақсад — одамларни фақат катталиги билан эмас, балки мазали ва сифатли мева билан хурсанд қилишдир.
