Италиянинг шимолидаги Трентино–Жанубий Тироль вилоятида кўчки оқибатида Германиядан келган беш нафар альпинист ҳалок бўлди. Бу ҳақда маҳаллий Alto Adige нашри қутқарув хизмати маълумотларига таяниб хабар берди.
Маълумотларга кўра, фожиа 2 ноябрь куни Ортлес тоғ массивида содир бўлган. Қутқарувчилар эрталаб икки нафар шахс — ота ва унинг 17 ёшли қизининг жасадини топишган. Улар бир кун аввал тоғ этакларида бедарак деб ҳисобланган эди.
Қутқарув ишлари мураккаб шароитда олиб борилган. Шанба куни яна уч нафар жабрланувчининг жасади топилган, аммо қаттиқ туман сабабли операция вақтинча тўхтатилган. Об-ҳаво яхшилангач, қутқарувчилар вертолёт воситаси ёрдамида 2,5 минг метр баландликка кўтарилиб, ундан сўнг пиёда ҳолда ҳодиса жойига етиб боришган.
ОАВ хабарига кўра, кўчки остида Германиядан келган икки гуруҳ альпинист қолган. Биринчи гуруҳнинг уч аъзоси ҳалок бўлган, иккинчи гуруҳдан эса икки киши тирик қолган, яна икки нафари якшанба тонгигача бедарак деб ҳисобланган.
Ортлес тоғ массиви — Италия Альп тоғларининг Швейцария билан чегарасига яқин қисми бўлиб, тажрибали сайёҳлар ва альпинистлар учун машҳур йўналиш ҳисобланади.
