Корея Республикасининг энг қадимий ва нуфузли таълим даргоҳларидан бири — Ёнсе университети (Yonsei University) томонидан ташкил этилган 31-халқаро корейс тили ва адабиёти ижодий танловида ўзбекистонлик талаба, Тошкент давлат шарқшунослик университетининг 4-босқич талабаси Сабоҳат Ғофурова хорижлик иштирокчилар ўртасида биринчи ўринни қўлга киритди.
Осиёнинг Гарварди
1885 йилда асос солинган Ёнсе университети Корея таълимининг ифтихори, илмий салоҳият ва маърифат рамзидир. Унинг нуфузи шунчалик баландки, уни “Осиёнинг Гарварди” деб аташади. Университетнинг Сеул марказидаги қадимий биноси жасмин гуллари билан безатилган, илм ва тарих нафаси уфурадиган муқаддас даргоҳдир.
Ёнсе — Кореянинг энг кучли уч университетидан бири. У халқаро рейтингларда доимо юқори ўринларни эгаллайди: QS ва Times рейтингларида 100 талик рўйхатдан тушмай келади. Бу университетда таълим олиш — келажак элитаси сафига қадам қўйиш билан баробар. Samsung, LG, Hyundai каби компанияларнинг асосчилари ва раҳбарлари илк билимларини шу даргоҳда олишган.
Ғурур ва ифтихор
Ёнсе университети нафақат фан, балки адабиёт оламида ҳам буюклар бешигидир. 2024 йилда унинг битирувчиси, кореялик ёзувчи Хан Ган адабиёт бўйича Нобел мукофотига сазовор бўлган. Университет кампуси бу мукофотни катта тантана қилди, чунки бу бутун Корея таълим мактабининг ютуғи эди.
Шундай нуфузли даргоҳ ўтказган ижодий танловда ўзбек қизининг ғолиб бўлиши ғурур ва ифтихор уйғотади.
“Кўзгу” мавзусидаги шеър ва “Хотиралар” мавзусидаги эссе йўналишларида ўтган бу йилги танловда 76 мамлакатдан 1400 дан зиёд иштирокчи қатнашди. Улар орасида ғолибликни қўлга киритган ўзбек қизи Сабоҳатнинг ижодий иши нуфузли ҳакамлар ҳайъатида катта таассурот уйғотди. Унинг ижодида тилга муҳаббат, хотира ва инсон қалбини англашга интилиш мужассам эди.
Бундай улкан ғалабалар осонликча қўлга киритилмайди. Унинг ортида йиллар давомида қилинган меҳнат, тил ўрганишга бўлган сабот ва энг муҳими, ўз халқи шарафини юксалтириш орзуси ётади.
Таълим ислоҳотлари меваси
Сабоҳат Ғофурова каби илғор ёшларимизнинг ютуқлари тасодифий эмас. Бу сўнгги йилларда Ўзбекистонда таълим соҳасида амалга оширилаётган ислоҳотлар, ёшлар учун очилаётган имкониятларнинг мевасидир.
Президент Шавкат Мирзиёев ташаббуси билан хорижий тилларни ўрганишга турли имтиёзлар яратилди, халқаро стипендиялар, академик алмашинувлар, онлайн курслар ва замонавий ўқув муҳитлари йўлга қўйилди. Бу ислоҳотлар натижасида ўзбекистонлик ёшлар дунё университетларида ўз сўзини айта бошлашди.
Сабоҳатнинг ғалабаси ана шу давлат сиёсати, илмий муҳит ва миллий ғурурнинг натижасидир.
Ўзбекистон иқтидорли, ижодкор, изланувчан ёшлар ватани экани яна бир бор исботини топди.
