Қозоғистон Президенти Қосим-Жўмарт Тўқаев Ўзбекистон Президенти Шавкат Мирзиёев номига миннатдорлик хати йўллади. Бу ҳақда Оқўрда матбуот хизмати хабар берди.
Тўқаев хатда жорий йилнинг 14–16 ноябрь кунлари Ўзбекистонга амалга оширган давлат ташрифи давомида Қозоғистон делегациясига кўрсатилган илиқ меҳмондўстлик учун самимий миннатдорлик билдирган.
Мактубда мазкур ташрифнинг тарихий аҳамиятга эга экани қайд этилган. У Қозоғистон ва Ўзбекистон ўртасидаги стратегик шериклик ҳамда иттифоқдошликни мустаҳкамлашга муҳим туртки бергани таъкидланган.
Тўқаев, шунингдек, Тошкентда ўтказилган Марказий Осиё давлатлари раҳбарларининг VII Маслаҳат учрашуви юқори даражада ташкил этилганини алоҳида эътироф этган.
Унинг таъкидлашича, минтақа ҳамкорлигининг барча йўналишларида ўтказилган мазмунли муҳокамалар, қабул қилинган муҳим қарорлар ва ҳужжатлар, шунингдек, Озарбайжоннинг тўлаҳуқуқли иштирокчи сифатида қўшилиши форумга стратегик аҳамият берган.
