Ўзбекистон Миллий гвардияси таркибида фаолият юритган Қўриқлаш бош бошқармаси Ички ишлар вазирлиги ҳузуридаги Қўриқлаш департаменти этиб қайта ташкил этилди. Бу Президентнинг 28 ноябрда имзоланган “Ички ишлар органларининг қўриқлаш соҳасидаги фаолиятини самарали ташкил этиш чора-тадбирлари тўғрисида”ги қарори билан белгилаб қўйилди.
Департамент бошлиғи вазифасини бажарувчи этиб полковник Қобил Адилович Шодибеков тайинланди. У бу лавозимгача Тошкент шаҳар Қўриқлаш бошқармасига раҳбарлик қилган.
Қарорга мувофиқ, янги департамент зиммасига қуйидаги вазифалар юклатилди:
давлат ва хусусий объектлар, таълим муассасалари ҳамда жисмоний ва юридик шахсларнинг мол-мулкини шартнома асосида замонавий усулларда қўриқлаш;
қўриқланаётган объектларда ички тартиб ва назорат режимларини таъминлаш;
қўриқлаш фаолиятига ахборот-коммуникация ва сунъий интеллект технологияларини кенг жорий этиш.
Шунингдек, 2026 йил 1 январдан бошлаб қўриқлов остидаги банклар, йирик ишлаб чиқариш корхоналари, маҳаллий ҳокимликлар ва бошқа объектларда фуқаролар кириб-чиқиш жойларига юзни таниб олиш технологиясига эга камералар босқичма-босқич ўрнатилади.
