1–2 декабрь кунлари Милан шаҳридаги Teatro alla Scala’da италиялик композитор Силвия Коласантининг янги “Anna A.” операси намойиш этилди. Лойиҳа La Scala тарихида аёл композиторга берилган илк буюртма сифатида эътибор қозонди.
Спектаклда ўзбекистонлик ёш опера хонандаси, “Ниҳол” мукофоти соҳиби Ақилбек Пиязов иштирок этиб, бир вақтнинг ўзида икки образ — шоир Николай Гумилёв ва ёзувчи Михаил Булгаков ролларини ижро этди.
Пиязовнинг чиқиши томошабинлар томонидан катта қизиқиш билан кутиб олинди. Унинг вокал ижроси ва драматик маҳоратли ўйини La Scala залидан баланд олқишлар билан баҳоланди.
Шу билан Ақилбек Пиязов La Scala саҳнасида дебют қилган биринчи ўзбекистонлик санъаткорга айланди.
