Қишлоқ хўжалиги соҳасида фаолият юритаётган фермерлар учун 2025 йил ҳосилидан биржа орқали сотилган пахта хомашёси бўйича давлат субсидиясини олиш имконияти ишга туширилди. Ушбу молиявий қўллаб-қувватлаш «Рақамли қишлоқ хўжалиги» ягона платформаси таркибидаги «Агросубсидия» ахборот тизими орқали амалга оширилади.
Субсидияга мурожаат қилиш тартиби оддий, аммо эътибор талаб қилади.
Аввало, талабгор фермер OneID ягона идентификация тизими орқали Agrosubsidiya.uz электрон платформасига кириши лозим. Кейин хизматлар рўйхатидан 2025 йил ҳосилидан биржа савдолари орқали сотилган пахта хомашёси учун мўлжалланган субсидия турини танлаб, ўз ҳудуди ва туманини белгилайди.
Шундан сўнг тизимда акс этган топширилган пахта миқдори ҳамда имзоланган ҳисобварақ-фактура маълумотлари диққат билан кўриб чиқилади. Барча рақамлар тўғри эканига ишонч ҳосил қилинганидан кейингина ариза электрон тарзда тасдиқланиши керак.
Муҳим жиҳат шундаки, мазкур субсидия Ўзбекистон Республикаси Вазирлар Маҳкамасининг 2025 йил 9 декабрдаги 771-сон қарорига мувофиқ фақат бир марта берилади. Агар ҳисобварақ-фактураларда кўрсатилган сумма ёки тоннаж амалда топширилган пахта миқдорига мос келмаса, аввало барча ҳужжатлар тўғри расмийлаштирилиб, кластер томонидан тегишли фактура ва товар-транспорт юк хатлари имзоланиши шарт. Шундан кейингина ариза бериш мақсадга мувофиқ ҳисобланади.
Масалан, фермер 100 тонна пахта топширган бўлса, ҳисобварақ-фактурада ҳам айнан шу ҳажм акс этган бўлиши керак. Агар ҳужжатда 95 тонна кўрсатилган бўлса, субсидия ҳисоб-китоби кам чиқади ва кейинчалик тузатиш имкони бўлмайди. Шу сабабли электрон имзо қўйишдан олдин тоннаж ва тўланадиган сумма ўзаро солиштирилиши шарт.
Эътиборли томони шундаки, ушбу субсидия пахта-тўқимачилик кластерлари, пахтани қайта ишлаш ва ип-калава ишлаб чиқариш занжирига эга тўқимачилик корхоналари томонидан етиштирилган пахтага, шунингдек, қишлоқ хўжалиги корхоналари томонидан етиштирилган тўртинчи ва бешинчи саноат навли пахта хомашёсига татбиқ этилмайди.
