АҚШ президенти Доналд Трамп Палм-Бичдаги матбуот анжуманида Вашингтон Венесуелада “хавфсиз, тўғри ва оқилона” ҳокимият алмашинуви таъминлангунча мамлакатни бошқариш ниятида эканини билдирди.
Трампнинг айтишича, АҚШнинг Венесуеладаги амалиёти “Ярим тун болғаси” деб номланган ва “муваффақиятли” якунланган. У Каракасда электр энергияси узилган паллада Мадуро қўлга олинганини даъво қилди.
Оқ уй раҳбари Мадурога нисбатан бир қатор айбловларни ҳам санаб ўтди: у гўёки Cартел де лос Солес наркокартелини бошқарган ҳамда АҚШнинг нефт инфратузилмасини ўзлаштирган. Трамп журналистларга бир ҳафта аввал ағдарилган Венесуела президенти билан гаплашганини, суҳбат чоғида ундан таслим бўлишни талаб қилганини айтди.
Трампнинг таъкидлашича, Венесуеланинг вайрон бўлган нефт тармоғини тиклаш учун АҚШнинг энг йирик нефт компанияларини жалб этиш режалаштирилган. У буни кўп миллиардли сармоялар деб атаб, улар Қўшма Штатларга фойда келтириши кераклигини қайд этди.
Президент Вашингтон бошқа давлатлар “Американи талаши”га йўл қўймаслигини, АҚШнинг Венесуеладаги қолиш муддати эса ҳокимиятни топшириш жараёни қандай кечишига боғлиқ бўлишини билдирди.
Трамп Венесуела мухолифати етакчиларидан Кристина Мария Мачадо ҳақида ҳам гапириб, аввалроқ АҚШ бостириб киришини қўллаб-қувватлаган бу сиёсатчи “Венесуелага лидер бўла олмаслиги”ни, унда етакчилик салоҳияти йўқлигини айтди.
Шунингдек, Трамп Кубани “азият чекаётган мамлакат” деб атади ва АҚШ кубаликларга ёрдам беришни хоҳлашини билдирди. Унинг сўзларига кўра, Куба мавзуси келгуси музокараларда асосий йўналишлардан бирига айланиши мумкин.
