Тошкент шаҳрида ҳокимият вакилининг ноқонуний ҳаракатига чек қўйилди. Давлат хавфсизлик хизмати ҳамда пойтахт ИИББ ходимлари ҳамкорлигида ўтказилган тезкор тадбир давомида Учтепа тумани ҳокимлигининг Уй-жой коммунал хизмат кўрсатиш ва ободонлаштириш бўлими бош мутахассиси қўлга олинди.
Маълум бўлишича, у тадбиркордан 3 минг АҚШ доллари талаб қилиб, пул маблағини олаётган вақтда ашёвий далиллар билан ушланган. Ҳокимлик вакили туманда бузилиши режалаштирилаётган савдо объектлари рўйхати тузилаётганини баҳона қилиб, тадбиркорга тегишли дўконни ушбу рўйхатга киритмаслик ва буздирмаслик эвазига пора сўраган.
Ҳозирда мазкур шахсга нисбатан Жиноят кодексининг тегишли моддалари билан жиноят иши қўзғатилиб, унга нисбатан “қамоқ” эҳтиёт чораси қўлланилган. Тергов ҳаракатлари давом этмоқда.
