Нотариал ҳаракатларни видеоконференцалоқа режими орқали амалга ошириш тартиби белгиланди. “Нотариал ҳаракатларни видеоконференцалоқа режими орқали амалга ошириш тартиби тўғрисида”ги низом Адлия вазирлигида давлат рўйхатидан ўтказилди.
Низомга мувофиқ, жисмоний ёки юридик шахснинг вакили нотариал идорага бевосита кела олмаган ҳолларда нотариал ҳаракатлар масофадан туриб видеоконференцалоқа орқали амалга оширилиши мумкин.
Нотариал ҳаракатлар “E-notarius.uz” ахборот портали ҳамда “Notarius” автоматлаштирилган ахборот тизими орқали тасдиқланади. Мурожаат қилувчи видеоконференцалоқа орқали хизмат олиш шартлари билан танишиб, электрон тарзда розилигини тасдиқлайди ҳамда амалга оширилаётган нотариал ҳаракат турини аниқ кўрсатиб, зарур маълумотларни тақдим этади.
Нотариус мурожаат келиб тушган пайтдан бошлаб бир иш куни ичида уни кўриб чиқиб, ҳужжатларда камчиликлар мавжуд ёки йўқлиги ҳақида хабар беради.
Шунингдек, видеоконференцалоқа жараёнида нотариал ҳаракат иштирокчилари жойлашган жойда учинчи шахслар бўлмаслиги, муҳит шовқинсиз ва етарлича ёруғ бўлиши ҳамда видеотасвир тиниқ кўриниши шарт.
Нотариал ҳаракат лойиҳаси тайёр бўлгандан сўнг нотариус томонидан тарафларга уларнинг ҳуқуқ ва мажбуриятлари, шунингдек амалга оширилаётган нотариал ҳаракатнинг мазмуни ва ҳуқуқий оқибатлари тушунтирилади.
